LAOAG CITY – Natay ti maysa a lakay kalpasan a maipagarop a nagbekkel iti uneg ti comfort room ti balay da iti Barangay 21, Sta. Maria iti ili ti Piddig.
Nabigbig ti biktima nga agtawen ti 80, naasawaan ken residente met laeng iti nadakamat a barangay.
Iti imbestigasyon dagiti kameng ti Philippine National Police (PNP), nakita ti maysa a miembro ti pamilya ti biktima a nakabitin iti uneg a mismo ti CR ti balay da.
Naamoan manipod iti pamilya ti biktima a kanayun nga agpasar ti sakit ti lakay gapu iti sagsagabaen na nga stage 4 throat cancer ken possible a daytoy ti nakapanunutan na a nagpakamatay.
Naitaray pay laeng ti biktima iti Piddig District Hospital iti ili ti Piddig ngem indeklara ni Dra. Estella Rivera a pimmusayen daytoy gapu iti asphyxia secondary to strangulation.
Inpasingked ti PNP nga awan ti nakita da a foul play iti pannakatay ti nasao a biktima.
