LAOAG CITY – Nasugatan ti ulo ti driver ti motorsiklo kalpasan a nadungpar ti maysa nga SUV iti national highway iti Brgy. Acosta iti siudad ti Batac.
Nabigbig ti biktima a ni Dionisio Garcia y Aurelio, agtawen ti 62, naasawaan, awanan ti lisensya a nagmaneho ken residente iti Brgy. 20-N Colo iti nasao a siudad idinto a ti driver ti SUV ket ni Richmond Baligod y Palada, agtawen ti 25, awanan asawa, civil engineer ken residente iti Brgy 34 Dariwdiw iti nasao a siudad.
Basar iti imbestigasyon dagiti otoridad, bayat nga agpapaabagatan a direksiyon ti SUV nga inturong ni
Baligod iti national highway ket nadungpar na ti motorsiklo nga inturong ni Garcia.
Gapu iti daytoy, nasugatan ti ulo ni Garcia ken dagus a naitaray iti Mariano Marcos Memorial Hospital and Medical Center iti nasao a siudad.
Nagtalinaed iti kustudyar ti PNP Batac ti SUV ken ti motorsiklo.
