LAOAG CITY – Maysa nga agtawen iti 24 a lalaki idiay Nigeria ti nakagun-od ti world record kalpasan a nagay-ayam ti video games iti uneg ti tallo nga aldaw.
Kinumpirmaran ti records keeping organization a Guinness World Records a ni Oside Oluwole wenno mas am-ammo iti alyas a “Khoded” ti baro a world record holder ti titulo a “Longest Videogame Marathon Playing a Soccer Game.” Daytoy ket kalpasan a nagay-ayam ti video game a Dream League Soccer 2023 iti uneg ti tallo nga aldaw.
Naammoan a tapno saan a makairisgo iti salun-atna, pinalubusan ti Guinness ni Oside a maaddaan ti lima a minuto a break iti tunggal maysa nga oras a panagay-ayamna ti video game. Mabalinna nga urnungen ti break time tapno mausar daytoy iti panagturog ken mapan iti comfort room.
Kabayatanna, ni Oside ket qualified biochemist ngem agtartrabaho isuna ita kas car dealer. Inaramidna ti record attempt daytoy tapno makaukkon isuna ti donasion para iti ospital iti ilida idiay Ijebu Ode, southwestern Nigeria.
