LAOAG CITY – Maysa a lalaki ti nakagun-od ti world record kalpasan a dimmalyasat iti intero nga Ireland babaen laeng iti naglugananna nga unicycle wenno bisikleta a maysa laeng ti ligayna.
Kinumpirmaran ti records keeping organization a Guinness World Records a ni Eamonn Keaveney ti baro a world record holder ti titulo a “Fastest Crossing of Ireland by Unicycle.”
Daytoy ket kalpasan a kinabaelanna ti dumalyasat iti paset ti Ireland iti uneg ti 5 nga aldaw, 5 nga oras ken 23 a minuto a nakalugan ti unicycle.
Naammoan a tapno magun-od ti world record, agbisbisikleta ni Keaveney ti 12 nga oras iti maysa nga aldaw.
Saan a daytoy ti umuna a Guinness title ni Keaveney. Immuna isuna a nabigbig idi maaddaan ti world record no sadinno kinabaelanna ti magna ti 2 a ribu a kilometro iti intero nga Ireland kabayatan a nakasaka-saka.
Kabayatanna, naaramidna mette ti ag-hiking iti 10 a bantay nga awan ti aniaman nga insuotna a proteksion iti saka.
