LAOAG CITY – Naalarma dagiti residente iti ili ti Solsona gapu iti panagprobokar ti maysa a lalaki nga addaan ti ikot a kutsilyo.
Nabigbig ti lalaki a ni Edwin Lumagday y Bonilla, agtawen ti 42, tubo iti Brgy. 24 Solsona ngem agdama nga agnanaed iti Brgy. Barcelona Solsona.
Segun ken ni PCapt. Belen Baoit, ti hepe iti PNP-Solsona, dagus a nagresponde da Police Patrolman Vincent Dominic Tabian kenni Police Patrolman Charlie Gambol iti 2nd provincial force company iti mismo a merkado publiko iti nasao nga ili apaman a naireport ti panagprobokar ti lalaki.
Nu pay kasta, saanda a naanawa daytoy agingga a nagturong iti kalsada ken nakadanon iti asideg ti munisipyo.
Naamoan nga apaman nga adda iti nasao a lugar ket intultuloy na a kinarit dagiti tattao pakairamanan dagiti dua a pulis kageddan ti panangilayat na ti iggem na a kutsilyo.
Gapu iti daytoy, pinaltugan ni patrolman Gambol ti akin kannawan a luppo ni Lumagday.
Kabayatanna, kuna ni Baoit nga intultluloy daytoy ti nagprobokar ken insuko na laeng ti kutsilyo idi nakariknan ti panagkapsot.
Dagus met a naipan daytoy iti RHU iti nasao nga ili ken nataming.
Kabayatanna, kalpasan a nataming ket naipakustodyar daytoy iti PNP Solsona ken manamnama a mapilaan ti Alarm and Scandal pakairamanan ti direct assault with attempted homicide.
Maipagarup nga adda ti problema iti panagpanpanunot ti lalaki ken mapan koma agpakonsultar iti albolaryo.
