LAOAG CITY – Kinumpirmaran ni Police Major Romnick Subia, mangidadaulo iti Criminal Investigation and Detection Group (CIDG) a maysa kadagiti lima a natiliw iti iligal a panagsusugal iti minatayan iti Barangay Bobon iti ili ti Burgos ket agpampammarang a miembro da.
Segun kenni Subia, adda dagiti naaw-awat da a report mainaig iti panagpammarang ti alyas “Gov” a kameng ti CIDG ken isuna ti mangidadaulo kadagiti pagsusugalan.
Inlawlawag na pay nga iti report ket agdawdawat daytoy ti kwarta wenno “tong” ken no saan a maited kenkuana ket ipangpangta na nga adda ti maiyuswat a raid babaen iti CIDG.
Gapo iti daytoy, kuna ni Subia nga inberipikar da ti report agingga a nangiyuswat da ti operasyon a nakatiliwan ni alyas “Gov” ken uppat a sabsabali pay.
Kunana a kabayatan ti operasyon ket nakalibas dagiti dadduma kalpasan a limmaban da kadagiti otoridad.
Inpalgak pay ni Subia nga idi natiliw ni alyas “Gov” ket nadakamat ti maseknan a nakasarita na ti “Col. Subia” ken idi dawatan da kadagiti ID ket awan ti naipakita na a mangpaneknek nga isuna ket kameng ti CIDG.
Mainaig iti daytoy, kunana a basar kenni alyas “Gov”, nangrugi a nagpammarang a kameng ti CIDG idi 2021 ken adda dagiti naibaga na a kakadua na nga isu ti manarimaan nga iberberipikar da.
Kabayatanna, nakumpiskar iti operasyon ti maysa a set ti baraha, maysa a table cloth, maysa a lamisaan, uppat a monoblock chair ken pusta a 1,245 a pisos.
Immapela met ni Subia iti publiko nga ireport laeng kadakuada no adda ti kastoy a pasamak.
