LAOAG CITY – Manamnama a mapilaan ti reklamo a theft ni Eugene Pascual Pimentel, addaan ti umno nga edad, ken residente iti Barangay 48-A, Cabungaan ditoy ciudad ti Laoag.
Daytoy ket kalpasan ti maipagarop a panagtakaw na ti baboy a kukua ni Mrs. Imelda Agustin Layugan, residente met laeng iti nadakamat a barangay.
Segun kadagiti nakakita, nakalusot ti baboy ni Layugan ket maipagarup a natiliw ni Pimentel ken ti saanen a nabigbig a kadwana kalpasan na ket inlugan da iti kurung-kurong.
Mainaig iti daytoy, inpetteng ni Barangay Kagawad Glenn Tungpalan Basilio a nabayagen a problema da iti barangay da ti nasao a suspek gapu kadagiti nakairamramanan na a riribok ken daytoy ket maysa pay a drug surrenderee.
Gapu iti daytoy, binalakadan ni Basilio ni Pimentel nga agpakitan tapno sangwen na ti reklamo a maipila kontra kenkuana.
