LAOAG CITY – Maysa a naidumduma a kaso ti pannakatiliw iti maysa nga agtatakaw idiay Japan, ti maysa a lalaki a nagtakaw ti dua a pack ti giniling a karne iti Sapporo ket naarestar dagiti pulis uray addan iti adayo a lugar daytoy.
Idi Setiembre 17, maysa nga agtawen ti 41 a lalaki ti nagtakaw ti karne iti maysa a supermarket iti Hokkaido, ngem natiliw isuna ti security guard. Iti baet ti pananglapped daytoy ti security guard, nakalibas ti suspek.
Iti tulong ti surveillance network ti pulisia, pakairamananen dagiti camera iti kalsada ken dagiti istasion ti tren, nabirokan ti lalaki ken natiliw isuna iti Chita, Aichi Prefecture idi Disiembre 23, maysa a lugar nga adda iti sumurok 1,000 kilometers ti kaadayona manipud iti nakapasamakan ti krimen.
Ti alisto ken naiget a panangmonitor dagiti otoridad iti tunggal garaw ti suspek ket mangipakpakita ti epektibo a sistema ti surveillance idiay Japan.
