LAOAG CITY – Naipilan ti direct assault kontra iti suspek a nangtungpa iti kasinsin na ken nangdanog iti kapitan idiay Brgy. Pagsanahan Sur, Badoc, Ilocos Norte.
Nabigbig daytoy a ni Emerson Cainguitan y Vergara, 34, mannalon idinto a ti biktima ket ni Victor Cajudoy y Cainguitan, 40, awanan ti asawa, mannalon, ken agpada a residente iti nasao a barangay.
Immun-una iti daytoy, inbatad ni Police Major Artemio Clemente, hepe ti PNP-Badoc a ni Clemente a bayat ti imbestigasyon da ket agtugtugaw ni Cajudoy iti asideg ti balay da Cainguitan ken idi simmangpet ti suspek a nabartek ken nagdinniskutir da agingga a tinungpa na ti biktima usar ti tsinelas.
Inbatad na a kalpasan daytoy ket dagus a pimmanaw ti suspek ngem nagsubli kadwa na ni Brgy. Chairman Antonio Talub tapno mapan agpadespensar.
Kunana a bayat ti saritaan ti kapitan ken dagiti dua ket dinarop ti suspek ti opisyal ken dinanog na ti babaen ti lapayag na.
Kabayatanna, kuna ti kapitan a plano na nga irekomendar nga ipa-drug test ti suspek gapo ta mapagat-atapan nga agus-usar ti iligal a droga.
Nupay kasta, kuna ti hepe nga awan ti nagan ti suspek iti listaan da ngem i-validate daytoy.
Iti agdama ket nagtalinaed iti kustudyar ti PNP-Badoc ti nasao a suspek.
