LAOAG CITY – Naarestar ti maysa a lalaki iti Brgy. Cabangtalan idiay Sinait, Ilocos Sur gapu iti kaso Frustrated Murder.
Segun ken ni PSSgt. Seymour Belarmino, ti Duty Desk Officer ti Philippine National Police ditoy Siudad ti Laoag, ti suspek ket ni Melchor Reyes, agtawen ti 48, balo ken residente ti Brgy. Sta. Cruz, Sinait, Ilocos Sur.
Inbatadna a balligi a nakemmeg ti suspek babaen iti nagtitipon a pwersa ti Laoag City Police Station ken ti Provincial Special Enforcement Team iti panangidaulo ni PLt.Col. Joemar Labiano pakairaman ti PIU-INPPO, INTPU, 101st MC, RMFB1, Sinait Municipal Police Station ken Ilocos Sur Police Provincial Office.
Kunana a natiliw ti nasao a suspek gapu iti baro a pannakaiparuk-at ti Warrant of Arrest nga inyisyu ni Presiding Judge Ramon Pacis ti RTC Branch 14 ditoy Siudad ti Laoag a napetsaan idi Nobiembre 18, 2003.
Inlawlawagna a nairekomendar ti 200 a ribu a pisos iti suspek para iti temporario a pannakawaya-waya daytoy.
Iti agdama ket nagtalinaed ti suspek iti PNP-Laoag para iti naan-anay a dokumentasyon ken umiso a disposition sakbay a mai-turn over iti korte a naggapoan ti warrant.
Kabayatanna, nagkedked a mangted iti aniaman a komento ti suspek.
