LAOAG CITY – Maysa a lalaki idiay Arizona, U.S.A. ti nakagun-od ti world record gapu iti basketball trick shots talent.
Kinumpirmaran ti records keeping organization a Guinness World Records a ni Jeremy Ware ti baro a world record holder ti titulo a “Longest Underhand Basketball Shot Blindfolded.”
Daytoy ket kalpasan a ma-shoot ti bola kabayatan a naka-blindfold nga adda ti kaadayona nga 18.28 meters wenno 60 a kadapan manipud iti ring.
Daytoy ti maikatlo a world record ni Jeremy nga adda ti pakainaiganna iti bola.
Iti napalabas a tawen, nagun-odna ti titulo a “Farthest Basketball Shot Made Backwards” nga addaan ti rekord a 26.06 meters ken nagun-odna pay ti titulo a “Most Squats on a Swiss Ball in One Minute” nga addaan ti rekord a 37.
Inbatad ni Jeremy, iti tallo a Guinness World Record-na, ti panag-shoot ti bola a naka-blindfold ti karigatan nga inaramidna.
