LAOAG CITY – Napilaan ti kaso nga attempted homicide ti agtawen ti 47 a lalaki kalpasan a nabagkong na ti agtawen ti 51 a kabsat na iti Sitio Liwliwa iti Barangay Suyo ditoy ciudad ti Laoag.
Daytoy ti inbaga ni Police Lt. Col. Rafael Lero, ti chief of police ditoy ciudad ti Laoag.
Inbaga ni Lero nga iti imbestigasyon da, kabayatan a matmaturog ti biktima ket napan prinobokar ti nabartek a suspek.
Naamoan a kayat koma nga anawaen ti biktima ti kabsat na ngem adda ti iggem na a kutsilyo isut gapuna a nagsubli daytoy iti kwarto na.
Nupay kasta, napan sinaruno ti suspek ti biktima ken kayat na koma a lukatan ti ridaw ngem idurduron ti naud-udi.
Gapu iti daytoy, binagko-bagkong ti suspek ti ridaw no sadinno a simmarot ti immuko a nakatamaan ti akin-akin-kannigid a dakulap ti biktima.
Rumrumuar a ti motibo iti napasamak a pammagkong ket gapu iti kinabartek ti suspek nga iti agdama ket nagtalinaed iti kustodyar ti PNP ditoy ciudad ti Laoag.
