LAOAG CITY – Natay ti nakabisikleta a lalaki kalpasan a nakadinnungpar na ti maysa a motorsiklo iti paset ti 1909 Street bisinidad iti Barangay 4 Sta. Maria iti ili ti Vintar.
Binigbig ni Police Lt. Randy Damo, ti deputy chief of police iti ili ti Vintar ti biktima a ni Merlito Tunac, agtawen ti 63, taga Barangay 8, Margaay iti ili ti Vintar idinto a dagiti nakalugan ti motorsiklo ket isuda Mario Bolusan, agtawen ti 60, ken ti asawa na a ni Jonalyn Bolusan, residente dagitoy iti Barangay Columbia iti met laeng nasao nga ili.
Inbaga ni Damo a basar iti imbestigasyon da ken ti CCTV footage a nakatutuk iti nakapasamakan ti desgrasya, agpapa-amyanan a direksyon ti biktima ken idi agkurba ket maipagarop a saanna a napakadaan ti sumungad a motorsiklo a nangitunda ti panagdinnungpar da.
Segun kenni Damo, napan nagdigus ti biktima iti karayan a sakop ti Bislak River ken iti panagawid na ket ditoyen a napasamak ti insidente.
Naitaray iti ospital ti biktima ngem naideklara a dead on arrival idinto a dagiti agasawa ket gasgas ken bassit laeng a kamuol ti sinagaba da.
Agpapan maisursurat daytoy a damag ket saan pay a masinunuo no ania ti desisyon ti pamilya ti biktima, no agpila da ti reklamo wenno saan.
