LAOAG CITY – Ammo dagiti residente iti Barangay 53, Rioeng ditoy ciudad ti Laoag no anya ti kinapudno seknan iti napasamak a rambol.
Daytoy ti inbatad ni Barangay Captain Manuel Savellano kalpasan a kinondenar isuna ti maysa a kabarangayan na babaen iti post na mainaig iti daytoy a banag.
Segun iti kapitan, pudno nga awan isuna idi napasamak ti panagrarambol dagiti lallaki ken ti impormasyon nga inbaga na iti publiko ket naala na kalpasan met laeng ti panagsasango da iti Philippine National Police.
Inbatad na a kalpasan ti pangipaay na ti statement iti publiko ket ditoy metten a nangrugi nga agipost ti ikit ti maysa kadagiti nakabkabil a napasamak iti igid ti kalsada iti Sitio 4 iti nasao a barangay.
Kunana a basar iti pulisya, rumrumuar a ti biktima a kaanakan ti nagpost ket isu met ti ummuna a kimmarit kadagiti lallaki a nangkabkabil iti daytoy.
Mainaig iti daytoy, inpetteng na nga awan metten ti plano na a trataren daytoy iti barangay da gapo ta patien na a napinpintas no solbaren dagiti maseknan iti Philippine National Police.
