LAOAG CITY – Maysa a thrift shopper idiay Illinois, U.S., ti nangiyawid ti naidumduma a porcelain plate nga agbalor ti rinibu a dolyar ken nagatangna laeng daytoy iti balor a $4.99 wenno agarup P280 iti maysa a secondhand store.
Ti nagasat a lalaki a ni John Carcerano ket maysa a beterano nga antique hunter a nabayagen a gumatgatang kadagiti secondhand stores.
Kabayatan a gumatgatang, nariparna ti maysa a nakadulin a pinggan iti baba ti moderno a banag.
Babaen ti Google Lens, insigidna nga inalaan ti ladawan ti pinggan ken naammoanna ket adda ti kapadana a pinggan a nailako iti balor a $4,400 wenno katukad ti sumurok P250,000.
Saan a nagpangadua a gatangen daytoy. Kalpasan nga ipa-appraise kadagiti eksperto iti Sotheby’s ken dadduma pay nga auction houses, nakumpirmaran ti nagatangna ket maysa a naidumduma a “Chinese export armorial platter” sipod pay idi 1775 iti panawen ti Qing dynasty.
Rumrummuar a perpekto pay ti kondision ti pinggan, awan ti gasgasna wenno pakalasinan a nausaren.
Gapu iti daytoy, mapatta-patta a dumanon iti $4,000 agingga iti $6,000 ti balor daytoy wenno dumanon iti P230,000-P340,000.
Para ken ni Carcerano, ti sikreto ti panagballigi iti panangbirok kadagiti antique kadagiti secondhand store ket anos ken umiso a timing.
Masansan a padpadaananna dagiti bagsak a mailaklako sakbay a maagaw ti dadduma.
Iti daytoy a gundaway, maysa a simple a pinggan ti nagbalin a jackpot-na.
