LAOAG CITY – Maysa nga architect ken professional card stacker ti nakagun-od ti world record kalpasan a nakaaramid isuna ti nakangatngato nga house of cards iti uneg ti walo nga oras.
Kinumpirmaran ti records keeping organization a Guinness World Records a ni Bryan Berg ti baro a world record holder ti titulo a “Tallest House of Cards in 8 Hours.”
Daytoy ket kalpasan a nakaipatakder isuna ti agsusukot a baraha nga addaan ti 54 levels.
Saan a nagusar ti aniaman a pagpikket wenno support ni Berg ken kas pammaneknek a natibker ti inpatakderna nga house of cards ket pinarabawanna ti cell phone iti tuktok daytoy.
Saan met daytoy ti umuna a world record ni Berg nga adda ti pakainaiganna iti baraha.
Iti agdama, iggemna pay laeng ti rekord iti titulo a “Tallest Playing Card Structure” nga addaan ti rekord a 29 feet and 9 inches.
