LAOAG CITY – Inlawlawag ni Mr. Ronnie Robero, taga Brgy. Billoca iti ciudad ti Batac iti pannakakita na ti ubing a maipagarup a nagandat a makumaw iti ciudad ti Batac.
Maipalagip a naggapo iti dakkel a mall ti ubing kadwa na ti uliteg na ngem imununa a nagawid a maymaysa ti nasao nga ubing.
Segun kenni Robero, nasabat ti ipag na ti ubing a magmagna nga agsangsangit a nakagalot ti ima na iti likod ti bagi na.
Basar iti pannakisarita na iti ubing, nagdissaag ti ubing iti waiting shed iti Quiling a labes iti Garasgas Bridge.
Inlawlawag ti ubing nga apaman a nakadissaag daytoy ket adda iti simmaruno a van no sadinno a bimmaba dagiti 5 a lallaki a nakaabungot ket ditoy a ginandat da nga ilugan daytoy.
Inbatad na a dagus a nakalibas isuna kadagiti suspek gapu ta naggulagol daytoy ken nagtartaray.
Kuna ni Robero a nairot iti pannakareppet ti ima ti ubing babaen ti straw rason a nagusar pay daytoy ti buneng tapno mawaswasan iti pannakagalot na.
Kalpasan na dayta ket insigida a nagkamang da iti PNP Batac.
Kabayatanna, manarimaan ti panagimbestigar dagiti otoridad iti daytoy a pasamak ken ur-urayen da iti pannakakumpleto ti detalye iti nadakamat nga insidente.
Rumrumuar nga adda iti kinakunsabo ti ubing a kaklase na a nanggalot ti ima na.
