LAOAG CITY – Nabirukan ti maysa a bangkay ti lalaki iti paset ti Brgy. Boyboy iti ili ti Piddig.
Segun ken ni P/Maj. Kristian Lee Badua, Hepe ti Piddig Municipal Police Station, nabigbig ti biktima a residente iti ili ti Dingras ngem agtartrabaho laeng isuna kas construction worker iti ili ti Piddig.
Inbatadna a nakaawatda ti report manipud iti maysa a concern citizen a limmabas iti nasao a kalsada a nakakita iti maysa a motorsiklo pakairamanan ti driver daytoy nga awanen ti biagna.
Gapu iti daytoy, kunana a dagusda a napan nagresponde iti nasao a lugar kaduada ti Municipal Health Office nga idadauloan ni Dr. Corazon Martin.
Inlawlawagna nga apaman a nakasangpetda iti lugar a nakapasamakan ti insidente ket nalamiisen a bangkay ti biktima nga adda iti paset ti kanal a posible a na-overshoot a nangitunda ti pannakaitupa ti ulona.
Inpalgakna a basar ken ni Dr. Martin ket addan ti agarup walo agingga sangapulo nga oras ti napalabasen a natay ti biktima sakbay a nakita iti nasamek a lugar ken awan ti makita a pakalasinan nga adda ti foul play a napasamak.
Naammoan a nakita pay dagiti otoridad dagiti sumagmamano a construction materials ti biktima.
Innayonna a posible a naggapu iti pagiinuman iti pagtrabahoan ti biktima idi napasamak ti insidente.
Iti agdama, agtultuloy pay laeng ti iwaywayat nga imbestigasion dagiti otoridad maipapan iti nasao a pasamak.
