LAOAG CITY – Nagtalinaed ti motorsiklo a nagluganan ti maysa a lalaki iti PNP Pasuquin kalpasan a naidungpar daytoy iti maysa a poste iti Brgy. Binsang iti ili a Pasuquin.
Nabigbig daytoy a ni Ronnie Mallari y Ramiro, agtawen ti 45, naasawaan ken residente ti Brgy. 7, San Pedro iti ili a Bacarra.
Segun ni Police Senior Master Sergeant Joey Aninag, Chief Investigator ti Philippine National Police Pasuquin, bayat nga agpapaabagatan a direksion ti biktima ket naawanan daytoy iti kontrol a nangitunda ti pannakaidungparna.
Gapu iti daytoy, nagsagaba ti biktima ti sugat iti nagduduma a paset ti bagina ken nabuttawan pay ti akinkannawan a dapanna gapu iti naitudok a parte ti motorsiklona.
Inbatad ni Aninag nga adda ti impluwensiya ti nasanger ti biktima ken awan helmet idi mapasamak ti aksidente.
