LAOAG CITY – Pimmusay ti maysa a lalaki a nakamotorsiklo kalpasan ti napasamak a desgrasya iti Brgy. Baduang iti ili ti Pagudpud.
Ti biktima ket agtawen ti 30, naasawaan ken residente iti Barangay Poblacion 2 iti nasao met laeng nga ili.
Segun kenni Police Chief Master Sergeant Judymar Yadao, ti chief investigator ti Philippine National Police – Pagudpud, agpaabagatan ti motorsiklo a nagluganan ti biktima ken ti maysa a kurong-kurong nga inturong met ti 38, naasawaan, maysa a mannalon ken residente iti Barangay Baduang.
Inbatad na nga immovertake ti nakamotorsiklo agingga a nasapgud na kurong-kurong ken naideretso iti kataltalonan ti motorsiklo.
Naitaray dagiti dua a driver iti Bangui District Hospital para iti naan-anay a pannakataming da ngem naideklara a pimmusay ti driver ti motorsiklo.
Kuna ni Yadao a ti driver ti kurong-kurong ket mapan kuma laeng agpainom ti taraken na a baka idinto a ti driver ti motorsiklo ket ipadpadas na ti motorsiklo na ngem naamoan a napaspas ti panagpataray dagitoy.
Naamoan pay a ti driver ti motorsiklo ket nakainom iti nasanger idi napasamak ti desgrasya.
