LAOAG CITY – Natay ti maysa a lalaki a nangiturong ti motorsiklo kalpasan a nadungpar na ti Isuzu Forward Truck iti paset ti Barangay 7 iti ili ti Bacarra.
Nabigbig ti biktima a ni Mario Flores, agtawen ti 40, awanan ti asawa, mannalon, ken residente iti Barangay Bani iti nasao nga ili.
Iti inisyal nga imbestigasyon ti Philippine National Police iti ili ti Bacarra, kabayatan ti panagatras ti Isuzu Forward Truck ket sinenyasan ti pahinante ti biktima nga agsardeng paylaeng.
Nupay kasta, possible a saan a nakita a dagus ti biktima daytoy rason a nagderderetso a nangitunda ti pannakadungpar na iti likudan ti Isuzu Forward Truck.
Gapu iti daytoy, nagsagaba ti nakana a sugat ti biktima kangrunaan na iti ulo na no sadinno nga iti panangeksamen ni Doctor Lester Sigabu iti Rural Health Unit iti ili ti Bacarra ket indeklarar na a dead on the spot ni Flores.
Basar iti pamilya ti biktima, napan nakigapas ni Flores ken agawid koman iti balay da idi napasamak ti insidente.
Iti agdama, nagtalinaed iti kustodyar ti Philippine National Police iti nasao nga ili ti driver ti Isuzu Forward Truck kabayatan nga agtultuloy ti imbestigasyon seknan iti napasamak.
