LAOAG CITY – Maysa a lalaki idiay Japan ti nakagun-od ti baro a world record kalpasan a makapatubo ti mula a clover nga addaan ti 63 a bulongna.
Kinumpirmaran ti records keeping organization a Guinness World Records a ti agtawen iti 45 a ni Yoshiharu Watanabe ti baro a record holder ti titulo a “Most Leaves on a Clover” kalpasan a nakapatubo ti maysa a clover plant nga addaan ti 63 leaves.
Basar iti Guinness, daytoy a titulo ti maysa kadagiti naisangsangayan a maatiw gapu ta saan a kaskarina nga agpatubo ti clover a lumabes iti tallo ti bulongna. Ti naudi a nakairekord daytoy ket maysa a lalaki a taga-Japan a ni Shigeo Obara idi 2009 no sadino nakapatubo daytoy ti 56 a leaf clover.
Ti clover ket maysa a klase ti mula ken addaan ti scientific name a Trifolium repens L., a kayatna a saoen ket addaan ti tallo a bulong.
Inbatad ni Watanabe, nangrugi isuna nga ag-cross pollinate kadagiti clover iti arubayan ti pagtaenganda idi 2012. Tawen 2020 idi nagballigi daytoy iti panagpatubo ti clover nga 49 a bulong.
Mamati isuna a makaipaay ti gasat ken ragsak daytoy ken mangnamnama a kastoy met ti agbalin nga epekto kadagiti tattao a makakita daytoy uray iti ladawan laeng.
