LAOAG CITY – Natay ti maysa a lalaki a nakinaig kalpasan nga imminum ti sexual enhancer iti maysa nga hotel ditoy siudad ti Laoag.
Ti nasao a lalaki ket agtawen ti 47 ken residente idiay Claveria, Cagayan idinto a ti babai ket taga ili ti San Nicolas.
Mainaig iti daytoy, inlawlawag ni Dr. Rodrigo Catcatan, mangidadaulo ti City Health Office ditoy siudad, dagiti lallaki nga adda ti kondision iti pusona kas kadagiti makapaspasar ti highblood wenno dati a na-heatstroke ket saan a mabalin dagitoy nga agtumar ti sexual enhancer gapu ta mangitunda iti pannakaatake iti puso.
Inbatadna a no adda ti sagsagabaen a sakit ti maysa a pasiente ket naiget a maipawil kadakuada ti panaginum kadagiti maibilang nga highly caffeinated drinks.
Naammoan a kabayatan ti pannakinaig ti nasao a lalaki iti maysa a babai ket ditoy a rumrummuar a napugsatan ti anges.
Kabayatanna, inrekomendar ni Dr. Catcatan nga agpakonsultar pay laeng iti doktor dagiti agkalikagum nga agusar ti aniaman a sexual enhancer tapno maliklikan a mairisgo ti salun-at dagitoy.
