LAOAG CITY – Natukkol ti akin-kannigid nga ima ti nakabisikleta kalpasan ti maipagarop a pannakasagup na babaen iti truck iti ili ti Pasuquin.
Segun kenni Police Major Vencioly Lozano, ti chief of police ti PNP-Pasuquin, ti biktima ket nagatendar iti Fun Bike a naiyuswat iti ili da.
Inlawlawag na nga itay nalpasen ti aktibidad ket nagsublin dagiti bikers iti Barangay Davila ngem bayat nga adda da iti national highway ket napasamak ti desgrasya.
Inbatad na nga agtultuloy ti panangimbestigar da no anya ti pudno a napasamak gapo ta dua ti rumrumuar a rason daytoy.
Karaman ditoy ti maipagarop a nasapgud ti truck ti nakabisikleta ken rumrumuar pay a kellaat a nagsardeng ti truck rason a dagiti sumarsaruno a dagiti naka-bisikleta ket nagdidikket.
Mainaig iti daytoy, kunana a kumpleto met ti protective gear ti nasao a biktima.
Inbatad ni Lozano a nakikoordenar da metten iti PNP ti kabangibang da nga ili para iti pannakabigbig ti driver ti truck.
Kabayatanna, nagpalagip ni Lozano kadagiti agbisbisikleta nga agannad ken masapol a kumpleto ti protective gear ken liklikan ti makilinnipit kadagiti dadakkel a luglugan.
