LAOAG CITY – Kinumpirmaran ni Police Chief Master Sergeant Erwin Ubasa, investigator on case iti PNP-Bangui a pimmusay ti maysa kadagiti karaman iti desgrasya iti Barangay Baruyen iti nasao nga ili.
Binigbig ni Ubasa ti pimmusay a ni Mario Baligad y Sy, addaan ti umno a tawen a naideklara a dead on arrival iti ospital.
Karaman pay iti desgrasya ti maysa a motorsiklo nga inturong ni Junell Talaro y Adatan, agtawen ti 24 ken residente iti Barangay Tarrag iti ili ti Pagudpud; maysa pay a motorsiklo nga inmaneho met ni Sammy Manuel y Velasco, agtawen ti 45, residente iti Barangay Nagsurot iti ili ti Burgos ken ti kinalubbon na a ni Dave Manuel Baloaloa, agtawen ti 27 ken residente iti Barangay Poblacion, Burgos ken ti kurong-kurong nga inturong ni Baligad ken dagiti nakalugan ket isuda Alden Aleta y Velasco ken Jenalyn Aleta y Lagundino, agpada a residente iti Poblacon 1, Burgos.
Segun kenni Ubasa, agpaabagatan ti motorsiklo nga inturong ni Talaro a napaspas ti taray na rason ti pannakapukaw na iti kontrol iti manibela agingga a dimmungpar iti masabat na a kurong-kurong ken nairamraman ti sumarsaruno a maysa pay a motorsiklo.
Gapo iti daytoy, nagsagaba ti sugat iti nagduduma a paset ti bagi dagiti biktima kangrunaan na kenni Baligad a puon ti nakatayan na.
Naamoan nga accident prone area ken nasipnget ti nakapasamakan ti desgrasya.
Mainaig iti daytoy, naamoan a dagiti driver kadagiti motorsiklo ket awan ti suot da nga helmet ken ni Talaro ket positibo a nakainom ti nasanger.
Kabayatanna, mabalin a sumango ni Talaro ti kaso kas iti Reckless Imprudence Resulting to Multiple Physical Injury, Homicide ken Damage to Property.
