LAOAG CITY – Agtultuloy a birbiruken dagiti otoridad idiay ili ti Solsona ti nangtutok ken nagpaputok ti paltog a ni John Bayle idiay Barangay Manalpac iti nasao nga ili.
Binigbig ni Police Captain Chris Anthony Sorsano, chief of police ti PNP-Solsona ti biktima a ni Alvin Pascual, maysa a welder ken residente iti Barangay Man-anteng iti nasao met laeng nga ili.
Segun kenni Sorsano, aggi-inom ti biktima ken dagiti barkada na, ken idi napan da gimmatang ti arak ket nagtambay ni Pascual iti sango ti balay ni Bayle a kaabay laeng ti pagtagilakoan.
Inlawlawag na a kabayatan ti panagtambay ni Pascual ket rimwar ni Bayle ken kellaat a tinutukan na ti paltog ti biktima ken dinamag na no adda ti kakadwa na.
Kalpasan daytoy ket kinamat dagiti kakadwa ni Pascua ni Bayle ngem saan da a nakamatan daytoy ngem nangeg da a pinaputok na ti paltog na iti naminsan a daras a kinumpirmaran met ti maysa kadagiti karruba da.
Inbatad ni Sorsano a ti kitkitaen da a motibo ket nagtripan laeng ti suspek ti inaramid na gapo ta awan met ti dati a riri da iti biktima.
Desidido met ti PNP-Solsona a pilaan ti kaso ti nasao a suspek.
