LAOAG CITY – Naikkatan ti uppat a ramay iti akinkannawan nga ima ti maysa a lalaki nga agtawen ti 37 kalpasan a napaputukan ti black bomb.
Segun ken ni Barangay Chairwoman Glenda Raquinio, ti Barangay 34-A, Gabu Norte ditoy siudad ti Laoag, inpurwak ti biktima ti black bomb nga iggemna apaman a nasindianna daytoy.
Nupay kasta, inbatadna a saan nga insigida a pimmutok daytoy isut gapuna a napan pinidot ti biktima ti paputok.
Inlawlawagna a nagusar pay ti flashlight ti biktima tapno biruken ti black bomb.
Kunana nga iti kanito a nakita ti biktima ti black bomb ket pinidotna ngem ditoyen a pimmutok ti nasao a paputok.
Gapu iti daytoy, naitaray iti Laoag City General Hospital ti biktima para iti naan-anay a pannakatamingna.
Mainaig iti daytoy, kuna ni Kapitana Raquinio a basar iti pannakisarsaritana iti kabsat ti biktima, ti black bomb ket in-order-da pay iti saan a masinunuo a lugar.
Naammoan a ti black bomb ket kasla kaarngi ti whistle bomb.
Kabayatanna, inpettengna nga awan ti agus-usar ti dinamita iti bukudda a barangay gapu ta naigetna daytoy nga ibalballaag kadagiti residente.
