LAOAG CITY – Kinumpirmaran ni P/Lt. Col. AMador Quiocho, Chief of Police iti PNP Laoag a maibilang a High Value Target ti lalaki a naarestar iti naisayangkat a drug buy-bust operation iti Brgy. Guerrero iti ili a Dingras.
Nabigbig ti suspek a ni Clifford Aquino y Valenzuela, agtawen ti 35, awanan asawa, mannalon ken residente iti nasao a barangay.
Agdagup ti 50 ribo a pisos iti balor ti naala a dakkel a sachet ti maatap shabu nga agdagsen ti 5 grams kenni Aquino ket maysa pay a sachet ti maatap a shabu nga agbalor ti sangaribo a pisos iti ginatang ti maysa a police poseur buyer.
Ni Aquino ket karaman iti Top 10 Drug Watchlist iti Provincial Level.
Naamoan a drug surrenderee pay ni suspek.
Inbatad ni Quiocho a nabayagen a sipsipotan dagiti otoridad ni Aquino.
Inlawlawag ti opisyal nga iti Brgy. Laureta iti immuna a nakaisayangkatan ti operasyon ngem idi madlaw ti suspek a pulis iti katrantransaksyon na ket nagtartaray daytoy agingga a nakadanon da iti Brgy. Guerrero iti ili a Dingras.
