LAOAG CITY – Balligi a natiliw ti maysa a lalaki babaen iti entrapment operation nga inyuswat dagiti kameng ti pulisya ditoy ciudad ti Laoag kalpasan a nagpangta nga iwaras na ti sex video da iti maysa a mangisursuro.
Ti suspek ket agtawen ti 35 a residente iti Barangay Balacad ditoy ciudad ti Laoag idinto a ti biktima ket agtawen ti 33 a residente iti ili ti Dingras.
Segun iti Philippine National Police, nagreport kadagiti otoridad ti biktima gapo iti panangbutbuteng kenkuana ti suspek nga iwaras na ti video no saan a mangted ti 30 a ribo a pisos.
Inadmitir pay ti biktima nga ummunan a nakaipaay ti agdagop ti 40 a ribo a pisos iti suspek gapo met laeng iti kapada a rason wenno pangta nga iwaras na ti video.
Gapo iti daytoy, nagreport ti biktima iti pulisya a nangitunda ti pannakaiyuswat ti entrapment operation a nakatiliwan ti suspek.
Kalpasan ti pannakatiliw ti suspek, sinukimat dagiti otoridad ti lugan na nga isu ti inusar na iti papan iti lugar ti transaksyon ken ditoy a nakaala da ti maysa a bassit a zip lock a naglaon ti maipagarop a napagango a bulong ti marijuana, tangkay ken bukel; tallo a pidaso ti genuine one thousand peso; 25 a pidaso ti one thousand boodle money; uppat a pidaso ti 500 a pisos ken maysa a cellphone.
