LAOAG CITY – Maysa nga agtawen ti 37 a lalaki idiay South Korea nga agarup saanen a makagaraw gapu iti muscular dystrophy ti nakaturpos ti master’s degree iti babaen ti panagsurat ti thesis babaen ti panagkidem ti matana.
Ni Jang Ik-sun nga adda ti sakitna nga in-inot a mangpakpakapsot kenkuana ngem saan a nagpaatiw iti kondisionna.
Iti baet iti kinaawan ti kabaelan nga agsurat wenno ag-type, sinaggaysana a binukel ti thesis babaen ti maysa nga eye-tracking mouse no sadinno iti kada letra ket mausarna babaen ti panagkidem ti matana.
Saan a nagbalin nga alisto ti ay-ayam. Gapu ta saan a makaiggem ti libro, nagusar isuna ti scanner tapno aramiden a digital dagiti libro nga awan iti e-book format.
Iti bigat, agtrabtrabaho isuna iti Gwangju Muscular Dystrophy Association idinto a no rabii ket agat-atendar daytoy iti klase ken agpuypuyat iti panagadal.
Idi Pebrero 21, opisial daytoyen a nagturpos iti Gwangju University nga addaan ti master’s degree iti Social Welfare ken nakaawat pay ti academic award kas pammigbig iti sakripisiona.
Iti thesis-na, inpettengna a ti kinapateg ti umdas a suporta para kadagiti adda ti rangkap ti bagina nangruna kadagiti mangnamnama iti ventilator tapno laeng mabiag.
Binabalawna ti kinakurang ti tulong manipud iti gobierno kangrunaanna ti limitado nga innem nga oras a subsidized caregiving assistance para kadagiti addaan ti nakaro a kondision.
Malaksid iti academic achievement-na, aktibo pay ni Jang iti panangitandudo iti muscular dystrophy iti babaen ti YouTube channel-na.
