LAOAG CITY – Nagtalinaed iti balay-pagagasan ti biktima kalpasan a nagsagaba ti sugat iti abagana gapu iti napasamak a pammaltog iti Brgy. Manalpac iti ili ti Solsona.
Segun ken ni Police Captain Randy Damo, ti Hepe ti Philippine National Police iti ili ti Solsona, basar iti insayangkatda nga imbestigasion, agarup 7:40 ti bigat ket nakaawatda ti report nga adda ti napaltogan rason a dagusda a napan nagresponde iti nasao a lugar.
Inbatadna a saanda pay a masinunuo no ania a klase a paltog ti naaramat iti insidente ngem adda ti nakitada a maysa a bala ti paltog a nausar iti napasamak.
Inlawlawagna a rumrummuar a ti maitudtudo a suspek ket ti mismo kabsat ti biktima.
Mamati ni Police Captain Damo a namunganay ti napasamak a pammaltog gapu iti riri dagiti agkabsat.
Kabayatanna, inpakaammo ni Mr. Zaldy Arida, kabsat ti biktima a napan kinomprontar ti suspek iti pagtaengan ti biktima kalpasan nga adda ti naidanon kenkuana a saan a napintas a sarita nga isu ti nangitunda ti panagrubrob iti pungtot ti suspek.
Gapu iti daytoy, kunana a nagapa ti biktima ken suspek ngem awan ti sabali a tao rason nga awan ti naganawa kadakuada.
Innayonna nga adda metten ti immun-una a panagriri dagiti maseknan a dua nga agkabsat ngem daytoy ti damo nga adda ti pammaltog a napasamak.
Kamaudiananna, rumrummuar nga imon ti motibo ti panangpaltog ti suspek iti biktima.
