LAOAG CITY – Nagballigi dagiti kameng ti Philippine National Police (PNP) iti ili ti Nueva Era kadwa da ti Laoag CPS ken PIU INPPO a nangtiliw ti maysa a lalaki a sumangsango iti kaso a theft iti nasao nga ili.
Binigbig ni Police Lt. Tolentino Erum, ti chief of police iti ili ti Nueva Era ti akusado a ni Ryan Loyd Domingo y Sambo, agtawen ti 30, awanan ti asawa, ken residente iti Barangay 9, Fariñas St. ditoy ciudad ti Laoag.
Natiliw ti akusado babaen ti bileg ti alias warrant of arrest nga inparuk-at ni Judge Perla Querubin iti 1st Judicial Region Branch 11 ditoy ciudad ti Laoag gapu iti kaso a Theft.
Naamoan a ti nasao nga akusado ket 13 a tawen a naglemlemmeng.
Nairekomendar ti 10 ribo a pisos a piyansa ti akusado para iti temporaryo a pannakawaya-waya na.
Iti agdama, nagtalinaed iti kustodyar ti PNP iti ili ti Nueva Era ti nasao nga akusado.
Mainaig iti daytoy, nagusar dagiti operatiba ti body worn camera kabayatan ti panangiyuswat da iti nasao nga operasyon.
