LAOAG CITY – Natiliw ti maysa a lalaki kalpasan a nagtakaw ti sangasako a bukel ti otong iti tiendaan ditoy ciudad ti Laoag.
Nabigbig ti suspek a ni John Lenon Inay, taga Barangay Puruganan, Dingras, Ilocos Norte.
Inadmitir ni Inay a naaramid na ti nagtakaw gapu ta awan ti pagpuunan na, ngem inpasingked na a daytoy pay laeng ti umuna a gundaway nga inaramid na ti krimen.
Nupay kasta, inpetteng ni Retired Major Ernesto Sadian, ti mangidadaulo iti Civil Security Unit (CSU) ditoy ciudad ti Laoag, nabayagen a sipsiputan da gapu iti panagtaktakaw na iti tiendaan.
Inlawlawag ni Sadian iti eksklusibo nga interview kenkuana iti Bombo Radyo Laoag nga itay parbangon ket binantayan dagiti kakadwa na ti CCTV ken nakita da ni Inay nga agsiput-sipot kalpasan na ket adda ti binitbit na a sako a naglaon ti bukel ti otong.
Apaman a nakita da nga adda ti binitbit ni Inay a sako ket napandan tiniliw.
Inpakaammo ni Sadian nga ado dagiti nangitudo ken ni nga isuna ti agal-ala kadagiti tagilako da.
Naamoan a dagiti taktakawen ni Inay a tagilako iti tiendaan ket ilaklako na idiay ili ti Dingras.
Inbatad ni Retired Major Ernesto Sadian, ti mangidadaulo iti Civil Security Unit (CSU) ditoy ciudad ti Laoag a no aldaw ti tienda ditoy ciudad ket isu ti papan panagtakaw ni John Lenon Inay a taga Barangay Puruganan, Dingras, Ilocos Norte.
Inlawlawag na a no mapan aglukat dagiti kameng ti CSU kadagiti pagtagilakoan iti tiendaan ket gundawayan na metten ti mapan agala kadagiti nagduduma a tagilako iti merkado publiko.
Gapu iti daytoy, binalakadan na dagiti maipagarop a tinakawan ni Inay a mapan da agpila ti pormal a reklamo da kontra iti suspek.
Kabayatanna, intudo ni Mrs. Norma Yadao a ni Inay ti nangala bag ti ikit na a a taga Sinait, Ilocos Sur nakaipalaunan ti kwarta nga umabot ti nasurok a 10 ribo a pisos malaksid pay ti dolyar ken cellphone.
Segun kenkuana, ti kwarta ket mapan koma igatang ti ikit na ti ilako na idiay lugarda.
Kinumpirmaran met ni Mr. Jomar Pascual, ti agbanbantay iti ayan ti CCTV iti tiendaan ditoy ciudad ti Laoag a no dadduma ket adda ti tallo a kakadwa ni Inay a dagitoy ti agserserbi a parasipot na.
Inlawlawag na a ti modus operandi na ket kalpasan a maala na ti kayat na a takawen ket mapan agsukat ti bado na.
Iti agdama, nagtalinaed ni Inay iti kustodyar ti PNP ditoy ciudad ti Laoag.
