LAOAG CITY – Nagpatulong ditoy Bombo Radyo Laoag ni Mr. Randy Viloria a taga Barangay 5 ditoy ciudad ti Laoag.
Daytoy ket tapno makaawiden ditoy ciudad ti Laoag gapu ta idi pay laeng rabii ti Lunes, Hulyo 20 ita a tawen nga agtaltalinaed iti igid ti kalsada idiay Cubao.
Segun ken ni Viloria, nagikkat iti trabaho na idiay Bauang, Batangas gapu ta nasuruken a dua a bolan a saan nga inawagan ti kompanya da gapu iti coronavirus pandemic ket awanen ti pagbayad na iti pagnanaedan na ken awan payen ti igatang na ti kanen na.
Inlawlawag na a kalpasan a nakaala kadagiti kasapulan na a dokumento para iti panagbiyahe na ket dagus a nagturong iti Metro Manila.
Nupay kasta, naupay ni Viloria gapu ta awan ti maluganan na a bus nga agawid ditoy ciudad ti Laoag.
Kuna a matmaturog lattan iti igid ti kalsada gapu ta awan ti ammo na a papanna pagdagusan idiay Manila.
Mangnamnama ni Viloria a matulungan daytoy a makaawiden ditoy ciudad ti Laoag.
