LAOAG CITY – Personal nga inpaima iti Bombo Radyo Laoag ni Mr. Alexander Lopez iti Barangay 16, Cayubog, Paoay ti napidot na a pouch bag.
Ti nasao a pouch ket naglaon iti agarup 18,000 a pisos ken nagduduma nga ID’s, lisensya ken ATM card a kukua ni Josephine Baraoidan Domingo iti Novales St. Barangay 1, Laoag City.
Segun kenni Lopez, napidot na ti pouch bag iti paset ti Brgy Balacad bayat nga agturong ditoy ciudad ti Laoag uggor ti maysa a trisikel.
Inbatad na nga uray agkasapulan ti kwarta ket saan na a napanunot nga idulin ti napidot na rason a nagderetso ditoy istasyon ti Bombo Radyo.
Kuna ni Lopez nga adda pay ti immuna a napidot na a pitaka a naglaon ti lima ribo a pisos ken ID’s ngem insubli na a dagus iti akinkukua.
Kabayatanna, naalan ni Domingo ti pouch na ken inikkan na ti gunguna ni Lopez kas panagyaman iti panangisubli na.
