LAOAG CITY – Napilaan ti kaso nga statutory rape ti maysa a lalaki gapu iti maipagarop a panangrames na ti kaanakan na nga agtawen ti lima nga ubing a babai iti Pinili, Ilocos Norte.
Segun ken ni Police Capt. Jophrey Taccad, OIC chief of police iti ili ti Pinili, naaktwan a mismo ti ina ti ubing ti panangmol-molestya ni alyas “Nato” iti biktima.
Basar iti nagbalin a palawag ti ina ti biktima a ni alyas “Ana”, nakita na ti suspek nga inubba na ti anak na ngem saanna nga inkaskaso gapu ta asideg a kabagyan ti asawa na.
Nupay kasta, nagbalaw ti ina kalpasan a sumagmamano nga orasen a saanna a nakita ti anak na.
Iti panagsaludsud na ket adda nakaibaga kenkuana a nakita da ti suspek a simrek iti balay na kadwa na ti anak na.
Dagus a napan ti nasao nga ina iti balay ti suspek ket ditoy a nakita na dagiti dua nga agpada a silalamo.
Gapu iti daytoy, innala na a dagus ti anak na ken kinabil na ti suspek gapu ti napalaus a pungtot na, kalpasan na ket nagderetso a napan nagreport iti kwerpo ti pulisya.
Iti panagresponde dagiti pulis ket awanen ti suspek iti balay na ken naamoan a napan nagpaing iti balay ti dati a kayong na iti ili ti Adams.
Inreport met ti dati a kayong ti suspek iti PNP ti kaadda na iti balay da ken isu ti nakatiliwan dagiti otoridad kenkuana.
Inbatad ni Taccad a saan a nakainom ti nasanger ti suspek idi napasamak ti krimen ngem rumrumuar nga agsagsagaba daytoy ti depresyon gapu iti panagsina da iti asawa na, addan pito a tawen ti napalabas.
Kinumpirmaran ni Taccad nga addan ti immuna a rekord ni Nato iti nasao nga ili iti isu met laeng a kaso ngem saan a natuloy a nakasoan.
Nagtalinaed ti suspek iti kustodyar ti PNP iti ili ti Pinili.
