LAOAG CITY – Inpadanun ti PNP Solsona iti Ilocos Norte Police Provincial Office ti insidente ti pannakapukaw ti maysa a lalaki iti nasao nga ili.
Binigbig ni Police Captain Chris Anthony Sorsano hepe ti PNP Solsona ti lalaki a ni Rowell Gallegos.
Kuna na nga inreport ti ina ti lalaki iti PNP ken dagus nga inpakaammo na iti INPPO tapno maiflash alarm iti nagduduma nga police station.
Segun kenni Sorsano, nagturong ni Gallegos iti Brgy. Butao, Calanasan, Apayao itay kallabes ken adda ti intugot da a dakkel a backpack.
Inbatad na a basar iti ina ni Gallegos a masansan nga agpukaw iti nabayag a panawen ken kelaat nga agparang kadakuada.
Saan nga ammo ni Sorsano no anya ti trabaho ti nasao a lalaki.
Innayon ti hepe a naudi a nakasarita ni Gallegos ti nangbuludan na iti motorisklo a kabsat iti dati na a kalive-in.
