LAOAG CITY – Manipud iti panagaramid ti pizza iti maysa a pizzeria iti Lower East Side ti New York kellaat a simrek ni Christiano Wennmann iti lubong ti high fashion kalpasan a naripar ti assistant ti designer a ni Willy Chavarria.
Ni Wennmann, agtawen ti 24 ket agtrabtrabaho idi iti Scarr’s Pizza idi madiskubre isuna ti team ni Chavarria a maysa a lawas sakbay ti Paris Fashion Week.
Naimbitaran isuna a makipaset kas modelo para iti underwear collection ti brand, maysa nga oportunidad a saanna a ninamnama ngem insigidana daytoy nga inawat.
Iti baet ti kinakurang iti kapadasan iti modeling, nagbalin a naballigi ti debut ni Wennmann iti Paris Fashion Week. Dakkel ti nagbalin a papel ti suporta manipud ken ni Chavarria ken ti team-na iti panangipaay ti kumpiansa iti barbaro a modelo. Mismo a ni Chavarria ti nangibaga ti “You’re already a star.”
Kalpasan ti naimballigian a panagrampa idiay Paris, insigida daytoy a nagpirma iti maysa a a nalatak a modeling agency.
Nagbalin a paset isuna kadagiti proyekto ti dadduma pay a designers kas ken ni Sami Miro ken rimmuar kadagiti fashion publication kas ti HERO ken Dazed.
Iti baet ti alisto a panagngato iti industria, nagtalinaed a grounded ni Wennmann.
Agtultuloy latta ti panagtrabahona iti Scarr’s Pizza ken saanna pay a plano a talawan ti datina a trabaho.
