LAOAG CITY – Ballaigi a naarestar ti maysa nga indibidual iti Barangay Kalaw iti ili ti Dumalneg gapu iti pinaglabsing na iti Republic Act No. 10591 wenno “comprehensive firearms and ammunition regulation act” ken Comelec gun ban.
Ti suspek ket agtawen ti 33, awanan ti asawa, caretaker ti talon, tubo ti Negros Occidental ngem agdama nga agnanaed iti nasao a barangay.
Segun ken ni Pol Cpt. Jackson Sugayen, ti Philippine National Police iti ili ti Dumalneg, adda ti nagkamang iti opisina da tapno ireport ti suspek nga addaan daytoy Caliber .22 rifle.
Kunana a bayat ti panagresponde dagiti kameng ti pulisya ket naimatangan da ti grupo dagiti lallaki nga aggi-inom ket ditoy a nakumpiskar da ti nangisit a bag a naglaon ti 10 a bala ti cal. 22 pakairamanan ti nasao a paltog.
Gapo iti daytoy, kiniddaw da iti maseknan ti dokumento ti paltog nga ikot na ngem awan ti naipakita daytoy.
Iti agdama, adda iti kustudiyar iti Philippine National Police Dumalneg ti suspek ken manamnama a mapilaan ti kaso babaen ti Republic Act No. 10591 ken Comelec gun ban.
