LAOAG CITY – Natiliw ti maysa a wanted person iti Brgy. 8 Tangaoan iti ili ti Piddig.
Basar iti Piddig Municipal Police Station, nabigbig ti suspek a ni Joselito Bartido y Espiritu, agtawen iti 42, naasawaan, awanan trabaho ken residente ti Brgy. 8 Tangaoan iti nasao nga ili.
Balligi a naarestar ti suspek babaen iti bileg ti Warrant of Arrest nga inparuk-at ni Hon. Aries John Lagmay ti First Judicial Region, Piddig-Carasi-Solsona, Ilocos Norte.
Natiliw ti suspek gapu iti kaso a Reckless Imprudence Resulting in Homicide and Damage to Property.
Naammoan a dumanon iti 60 a ribu a pisos ti nairekomendar a pagpiyansa ti suspek para iti temporario a pannakawayawayana.
Iti agdama, nakaibalod ti suspek iti Piddig Municipal Police Station tapno sangoen ti maiyannatop a pannusa.
