LAOAG CITY – Balligi ti naiyuswat nga entrapment operation babaen kadagiti kameng ti PNP-Laoag, PDEU ken Provincial Intelligence Unit iti INPPO iti Barangay 6 ditoy ciudad ti Laoag.
Nabigbig ti suspek a ni Jayrold Sahagun ken residente iti Barangay 38-A Mangato ditoy ciudad.
Naisayangkat ti nasao nga operasyon gapo iti panagusar na ti ladawan ti maysa nga indibidwal iti facebook tapno agdawat ti kwarta ken agipangpangta.
Segun met kenni Mr. Abigail Cacal, nangala ni Sahagun ti ladawan na iti facebook ken inusar na pay ti nagan na iti inaramid na a peke nga account tapno maisayangkat na ti modus na nga agdawat ti kwarta.
Inbatad na saan na a dagus a naamoan daytoy no sadinno ket adon dagiti transaksyon ni Sahagun kadagiti nagduduma nga indibidwal nga usar ti ladawan na.
Kunana a kalpasan a nausar ti ladawan na ket ado dagiti maaw-awat na a mensahe mainaig iti droga manipud kadagiti saan na nga am-ammo a tattao, kasta pay ti panagdawat ti kwarta.
Inlawlawag na pay nga iti transaksyon ti suspek ket aglako daytoy ti droga kadagiti am-ammo na partikular kadagiti papagayam na.
Gapo iti daytoy, idi natiliw ti suspek ket dagus a nagturong iti lugar tapno malawlawagan met ti nagan na.
Ummuna iti daytoy, kuna na nga addan ti makabulan ti napalabas idi nagkamang iti kapitan da.
Innayon na a nabayagen nga agam-ammo da kenni Sahagun.
Desidiso met daytoy a mangipila ti reklamo kontra iti nasao a suspek.
Kabayatanna, iti panagkapkap dagito otoridad ket nakaala da ti dua a sachet a maipagarop a naglaon ti maipagarop a shabu ken agdagup to 10 a ribo a pisos.
Naamoan a ni Sahagun ket karuruwar na laeng iti New Bilibid Prison idi Enero ita a tawen gapo iti kaso na nga homicide, babaen iti parole provision.
Nagkedked met ni Sahagun a mangipaay ti komento mainaig iti pannakatiliw na.
Mainaig iti daytoy, kuna ni Police Chief Master Sergeant Harold Nicolas iti PDEU a ti suspek ket karaman iti maysa nga aktibo a drug group nga agop-operar ditoy probinsya, ken adda iti provincial drug watchlist.
Inbatad pay ti Nicolas a dua dagiti agbalin a private complainant pakairamanan ditoy ni Cacal ken ti dinawatan na ti kwarta, ken ti maikatlo ket ti PNP.
Manamnama a ti maipila a kaso kontra kenni Sahagun ket grave coercion iti RA 286 iti Revised Penal Code ken panaglabsing iti RA 9165.
