LAOAG CITY – Binagkong ti maysa a lalaki iti kabsat na iti Brgy. 6 iti ili a San Nicolas.
Nabigbig ti suspek a ni Nelson Pascua y Rasay, 32, naasawaan idinto a ti biktima a kabsat na iti ina ket ni Raymon Tabanga y Rasay, 34, awanan asawa, agpada a construction worker ken agpada a residente iti nasao a barangay.
Basar iti imbestigasyon, bayat nga agi-inom ti nasanger ti biktima ken suspek kadwa da dagiti pagayam da ket dita a timpuar ti nabara a riri dagiti dua.
Simrek ni Pascua iti pagtaengan da tapno mangala ti kutsilyo ket ditoy a binagkong na iti buksit ti kabsat na a ni Tabanga.
Boluntaryo a simmuko ti suspek ken naipakustodyar daytoy iti PNP San Nicolas idinto a madama a maag-agasan iti ospital ti biktima.
Rumrumuar a ti motibo ti pammagkong ket gapu iti problema ti pamilya.
