LAOAG CITY – Agtultuloy a maag-agasan iti ospital ti lalaki a nanggandat nga agpakamatay iti Barangay 48-A, Cabungaan ditoy ciudad ti Laoag.
Ti biktima ket agtawen ti 24, naasawaan, residente iti Barangay Lumbad iti ili ti Dingras ngem agdama nga agnanaed iti Barangay 48-A ditoy ciudad.
Iti impormasyon manipud kenni Mr. Percival Doronio, agtagikua iti karinderia a pagpapaayan ti biktima, idi rabii ket nakainom ti nasanger ti biktima ken ti ammo ti asawa ti maseknan a mapan laeng umisbo.
Nupay kasta, saan a dagus a nagsubli ti biktima iti paggiddaan da isut gapo na a sinaruno na daytoy ken ditoyen a nakita na a nakabitin ti asawa na ken ngimmisiten ti bibig na.
Gapo iti daytoy, kunana a dagus met pinuted ti babai ti tali a nangitunda ti pannakaitupa ti ulo na iti batbato.
Nagsagaba ti biktima ti sugat iti ulo ken iti tengnged na gapo iti gandat na a panagpakamatay.
Dagus met a naitaray ti biktima tii Laoag City General Hospital ngem naiyakar iti Gov. Roque Ablan Senior Memorial Hospital.
Mainaig iti daytoy, kuna ni Doronio nga awan met ti nadlaw da a sabali a garaw ti lalaki isut gapo na a nakigtot da laengen idi naamoan da a ginandat daytoy ti nagpakamatay.
Inbatad ni Doronio a basar iti dumandanon nga impormasyon kenkuana ket maipagarop nga agim-imon ti lalaki.
Kabayatanna, rumrumuar a saan a daytoy ti ummuna a gundaway a ginandat ti biktima ti nagpakamatay gapo ta maipagarop nga inaramid na manen daytoy iti ili ti Dingras.
