LAOAG CITY – Maysa a costume designer idiay Amerika ti nakagun-od ti world record gapu iti inaramidna a kadakkelan a robot costume a nakabase iti maysa a Japanese anime.
Kinumpirmaran ti records keeping organization a Guinness World Record a ni Thomas DePetrillo ti baro a record holder ti titulo a “Tallest Gundam Costume.”
Daytoy ket kalpasan a nakabukel ti costume replica ti RX-78-2 Gundam robot nga addaan ti kangato a 10 feet and 3 inches.
Ti nasao a robot ket aggapu iti 1979 anime series a Mobile Suit Gundam.
Inbatad ni Thomas, dimmanon iti uppat a bulan sakbay a nabukelna ti costume. Nabaybayag ti nagbalin a proseso iti panangaramid daytoy no idasig kadagiti dadduma a costume-da gapu ta nangaramidda pay ti espesyal a double joint para iti tumeng ken ima ti robot tapno agbalin a realistic ti panaggaraw kabayatan a nakasuot daytoy.
Saan met daytoy ti umuna a world record ni Thomas maipapan iti costume making.
Iti napalabas a tawen, naawatna ti titulo a “Tallest mobile superhero cosplay costume” gapu iti Iron Man costume-na, “Tallest mobile cosplay costume based on a videogame” para iti Reinhardt costume-na ken “Tallest mobile cosplay costume” para iti Bumble costume-na.
