LAOAG CITY – Nakagun-od ti world record ti maysa a lalaki idiay Idaho, USA kalpasan a naka-dribble ti bola kabayatan a naka-blindfold dagiti matana iti uneg ti nasurok maysa nga oras.
Kinumpirmaran ti records keeping organization a Guinness World Records a ni David Rush ti baro a record holder ti titulo a “Longest Duration Dribbling a Basketball Blindfolded.”
Daytoy ket kalpasan a maka-dribble ti bola kabayatan a naka-blindfold iti uneg ti 1 nga oras, 37 a minuto ken 2 a segundo.
Inbatad ni Rush, maikadua nga attempt-na daytoyen no sadinno ti immuna a gundaway a pinadasna a ma-break ti world record title ket na-disqualify ti entry-na gapu ta nakatugaw daytoy kabayatan nga ar-aramidenna.
Naammoan a ni David Rush ket serial record breaker ken isuna ti addaan ti kaadduan a concurrent record holder title iti intero a lubong.
Iti agdama, addan ti nasurok 182 a world record titles ni Rush ken awan ti planona nga agsardeng ti pannakagun-od kadagiti world record.
