LAOAG CITY – Nagbalin nga inspirasion ni Roni Bandini ti ringgor ti karruba babaen iti karkarna a pannakaimbentona ti maysa a makina a makakontrol iti speaker ti karruba.
Segun ken ni Bandini napikar ti pasensiana iti Bluetooth speaker ti kaabay a yunit ti condominium-da no sadinno awan ti acoustics ti condo isu a mangeg ti patakur ti karrubana.
Idi saanen a kabaelan ti napigsa a musika ti karruba, nagdesision ni Roni a remediohan ti kasasaadna babaen ti naisangsangyan nga imbension.
Nangaramid daytoy ti makina nga inawaganna iti “Reggaeton Be Gone.”
Maysa daytoy a makina nga addaan iti mikropono, bassit a computer ken algorithm a makaduktal no maipatokar ti kanta ti reggaeton.
Kabayatanna, kinuna ni Bandini nga inusarna dagiti available materials ken code nga isuna mismo ti nangiprograma.
