LAOAG CITY – Maysa a lalaki idiay Brazil ti nakapag-party pay ti uppat nga aldaw sakbay a naduktalan a napaltogan daytoy iti ulona.
Nagatendar iti New Year’s Eve party ti college student a ni Mateus Faciom iti maysa a beach iti Rio de Janeiro. Iti baet ti kinaragsak, nariknana a timmama iti ulona. Temporario a nagsardeng iti paset ti ulo no sadinno daytoy a timmama.
Inpagarupna a bato laeng daytoy isu a saanna unay inikkan ti pateg ken intultuloyna a maki-party. Naglangoy pay daytoy iti baybay, imminom ti arak agingga iti bigat ti Enero 1.
Immabot pay agingga Enero 3 ti panagturongna iti dadduma a club tapno uminom ken nakirinnagsak ngem idi agmanmaneho daytoy nga agsubli iti ili ti Juiz de Fora, nakarikna daytoy ti spasm wenno panagtegerger iti imana.
Gapu iti kinasakit ken agtultuloy nga spasms, napilitan daytoy nga agsardeng nga agmaneho ken nagpakonsultar iti doktor.
Naammoanna nga adda ti bala iti utekna iti ospital. Insigida a naipadalan iti operasion ni Faciom tapno ikkaten ti bala.
Nagbalin a balligi iti operasion ken kinasapulanna nga agpaimbag iti ospital ti sumagmamano nga aldaw.
Iti agdama, im-imbestigaren dagiti pulis no naggapoan ti bala.
