LAOAG CITY – Maysa a lalaki idiay China ti nakaala ti atension kalpasan a nakairekord ti dua a baro a Guinness World Records babaen ti saan a gagangay a kabaelan ti panagusar ti baraha tapno iwaen ti pipino ken sindyanna a posporo.
Ni Zhang Yazhou nga am-ammo pay iti awag a “NengLiangJun” iti online ket ti talentona iti marksmanship gapu ta mahilig isuna nga agay-ayam ti tirador ken agpatayab ti bato iti karayan.
Idi agkolehio, rinugian ni Yazhou iti panagsanayna ti panangipurwak iti baraha ken saan a nagbayag, dagiti bidyuna nga in-post online ket nagbalin tapno agbalin a full time career.
Saan a nagal-alisto ni Yazhou iti pananggun-odna ti balligi. Dimmanon iti sumagmamano a bulan iti naiget a panagsanay tapno maasa ti kabaelanna. Daytoy met ti nangitunda iti pannakagun-odna ti naisangsangayan a titulo manipud iti Guinness.
Iti uneg laeng ti 60 a segundo, naaramidna nga iwaen ti 41 a pedaso ti pipino babaen kadagiti baraha nga inbatona.
