LAOAG CITY – Maysa a tradisional a sala ti nagbalin a sentro ti atension iti Easter Tuesday celebration idiay Cyprus kalpasan a nagpabuya iti panagsala ni Dinos Kkantis iti maysa a naidumduma a talento, ti panangbalanse ti sumurok 400 a wine glass iti ulona kabayatan nga agsalsala.
Dumanon iti 468 ti pakabuklan a bilang ti wine glasses a balligi a nabalanse ni Kkantis iti ulona kabayatan ti panangisayangkatna ti “Dance of the Glasses,” maysa a tradisional a sala idiay Cyprus.
Naammoan a kabayatan a bumaybayag ti panagsalana, in-inut a naynayonna kadagiti tray ti tasa iti ulona a napagtalinaedna ti garaw ken balanse.
No makumpirmaran ti Guinness World Records, maartapan ni Kkantis ti agdama a rekord a 319 a wine glasses a nairekord met ti maysa a Cypriot a ni Aristotelis Valaoritis idi Mayo 2023.
Iti agdama, manarimaan ti pannakaisubmitir ti bidyu ken dadduma pay nga ebidensia ti talento ni Kkantis para iti opisial a beripikasion ti Guinness.
Mangnamnama ti lokal a komunidad a maminsanda manen a magun-od ti pammadayaw iti benneg iti naidumduma a talento.
