LAOAG CITY – Maysa a serial record breaker manipud idiay U.S.A. ti nakagun-od ti 15 a world record iti uneg ti maysa nga aldaw.
Ni David Rush ket nabirngasan kas serial record breaker a ti gagemna ita a 2024 ket magun-od ti titulo a “Most Concurrent World Record Holder.” Ti agdama nga akin-iggem iti nasao a titulo ket ti Italian a ni Silvio Sabba nga addaan ti 180 concurrent record titles.
Naammoan a tapno maartapanna daytoy, bimmisita ni Rush iti headquarters ti Guinness World Records idiay London tapno makaaramid ti 15 world record titles.
Maysa kadagiti 15 a world record a na-break-na kabayatan ti kaaddana idiay London ket “Most bites taken from three apples whilst juggling in one minute” no sadinno nakagatna ti namin-198 a daras dagiti mansanas kabayatan nga itaytayyekna iti tangatang.
Iti agdama, bilbilangen ken kumkumpirmaren pay laeng dagiti taga-Guinness no naartapanen ni Rush dagiti concurrent record titles ni Sabba.
